|
Jisas - Alamblak
Here are some extracts from an Alamblak translation of the Bible that talk about Jesus. The extracts are from the Gospel of Mark.
 PDF version - extracts (56kB)
PDF version - book of Mark (235kB)
You will need Adobe Reader to view pdf files, which can be downloaded free here
_____________
Mak
1.1
Jon Baftaisr Bro Nkifrarhu mrokfom kfo pthamo yiham
1 Asom Bro Nkifrarhu yon Jisas Kraisrhu barkof gutnius mrokfefm.
1.14-15
Jisasr Galilit rihingrnakmo yuhat
14 Jonr bi kalabus yiyetrn to be Jisasrn Galiliko yihato Bro Nkifrarhu gutnius mrokfefm ptha habrimourm.
15 Kfo memour, "Asor bi tu yiha mifr. Bro Nkifrarhu kingdomkfot
bi brbohwot. Nikmoh fasoh fasoh nefm wamong trohkahkomm Bro Nkifrarhu
gutnius mrokfotn wawany yakiokomm."
1.21-27
Jisasr kmi yarh fknayet yimar yak marnyamo yuhat
21 Jisasr nd tur yak hanymo hik tamnou yimampno yimomn Kaperneamt
mifnahmom. Ndha Kaperneamt tohetmn rhu krna Sabat yihar rhumomr.
Nd yiharn Jisasr ndharhof rhu rifinyuk rmonrn yihato Bro Nkifrarhu
mrokfom rikfo nuhas bonuhasakmorm.
22 Jisasr mrokfom pthamohat nhai nd nkifra boririfhu tisam
kanjo ptharmotr wanyrmomr. Nhai. Tu hifa ptha yembindtmotrm, yimam
nd ror pthayuk mrokfom wanyhato bok dukefm yakhato duka memom, "Barenko, ndar yimar pthiwa mrokfom hifa ptha yembindt marnyewurm."
23 Nd rhu rifinyuk rmonrn rhumor kmi yarh fknayet yimar. Jisasr
kfo nuhas hanyetrn nd yimar sinyahato tau nakuyafhato kfo hutt
memor,
24 "Nasaret thof Jisase! Ni asha niaronn, nome finji naruhannom?
Nmoh yak batit niaro? Hti nhtiwann ni Bro Nkifrar yak htamo yimaye."
25 Jisasr sinyahato nd kmi yarhr kfo hutt memorr, "Ni nd kmi
yarhe, tmifn tngt wayoukihkahnt, nd yimar wathu troh tanynr."
26 Nd kmi yarhr inji wany hambtunihato tau tneh fnahmorn nd
yimar thu troh tanymorr.
27 Nd yimam inji htihato be tuha mifoh rihanimom. Tuha tum
rinakfo nakfo memom, "Bar yimako, ndart be tu wom nfrineft htitwonom.
Nd yimar pthe mrokfote tamoh bbukettn nd kmi yarhr wany hambu
tanyhato nd yimar thu troh tanyrr?"
1.32-34
Jisasr bok met yindarim yak marnyamo yuhat
32 Krifnano marr bi yohniyetrn, bok dbohnet dbohnetm, kmi yarh
fknayetm hne hnamomm.
33 Nd kmithu met yindari bugat niahato nd ror rhumo kuny yifhatiktn
nia rifiny yukatohmomr.
34 Jisasr fnahnehato bok met yindariroh wonk wonk dbohnefm
fak marnya hanymorm. Yo nd kmi yarh fknayetm fak thu hanymorm.
Kmi yarhm Jisasr hti hikhato duka memom, "Ndarr tu Bro Nkifrarhu
Yoner." Be ndnatn Jisasr kfo gadiyaf hanymoatrm, nhai tfit pthani
hanyrmoam.
2.1-12
Jisasr tir wura minysafet yimar yak marnyamo yuhat
1 Dfik marm yinyimotm tfit Kaperneamko yimor. Ndko yihato wom
kunys rhuhato pthamoatr met yindarim rhu wany yakitohmoumr.
2 Nd kunyr rifinyaknimohat memom nndo tpmhur tohwor. Kuny yifhatik
yuhat finji wom finji yimam yihom fnahni mfnahnikfot. Ror Jisasr
nd kunysn rhuhato Bro Nkifrarhu mrokfom kfo ptha nuhasmourm.
3 Nd kunysn ptha hasetrn wom minysafet yimar husfihus yimam
hnamomr.
4 Kunyr be tng mnderpat tohmotr, nhai wom yihotoham nd yimarhu
hanyukm. Be inji htitihato yura kuny mingiahus yak tmbrafmomt
to be nd yuhatn nd minysafet yimar fafho thumomr.
4.35-41
Jisasr kfohato wifort minoh hmbremo yuhat
35 Nd yiharhu tu wuroh krifn Jisasr turhu disaiperm kfo memorm,
"Barenko, na kanga tek barit ahir tmbhonikahnomn, mkuko ainyom."
36 Be nd mmbrt, bi nd tur rhumot, mikmbremomn hahir hayukmomr.
Nd yonmari yima rifhur tuha htanyhato yimom. Wom mmbrm rom rpat
hir hayukmom.
37 Hir hanymomn buha dany yuhatn bro wifort sinyamot. Nd wifort
sinyahato bi fak mndhu hanymotm. Bi bus tas finjo hanymott mmbrt.
38 Jisasr mmbrthu yifhikorn yak tuhtanimorn hwemor. Nd wifortpno
yihom yak thohato kfo memomr, "O Tisaye, wasinya. Nom bi wifort
kak mndhutwotnom. Nine ka nhai yanhokahn?"
39 Jisasr wasinyahato nd wifort be tnge kfo memort, "Be tmifn,
wateh tmbho." Be inji kfomotr nd wifort teh tmbhohato tek barit
nhai wom natonrmot.
40 Jisasr nd turhu disaiperm kfo memorm, "Tamohmpno yakrmitako?
Nhai duka mekahko, 'Rorpno kitwonom. Aduka yanhowahnom?' "
41 Rom inji wany yanhohato kfo memom, "Ndarr tamohtet yimarn
wiforti burifhut wany yakiohato minoh hmbrif?"
5.22-24
22 Judaroh rhu rifinyuk rmonthu wom tohukatoh yimar, rorhu
yufat Jairusr, niamor. Niamorn Jisasr mhtihato rorhu wurampno
mtabokmemor.
23 Mtabokmehato kfo memor, "Nanhu yont noh wururifhut kekwott.
Wania tir wahtakahtnt marnyaniraht."
24 Be Jisasr wanyhato hik hanymorr. Rof yimohat bok met yindari
rifhur hik hanymomrn be nahuta yaborr hanymom.
5.35-42
35 Jisasr ptha hasetrn Jairusrhu kunyshom toni hnehato Jairusr
yihom kfo kangmr, "Mirahn Bror ahany furayanr kunykort. Ninhu
yont bi mfaknit."
36 Jisasr rom pthayuk mrokfom wany marsisahato Jairusr kfo
memorr, "Ni mirahn awany yanhoya. Ninhu bro dukefr be duka mekfot,
'Nanhu yont tfit myenyjworaht.' "
37 Be nd met yindari rifhur ndhar kfo rafo tanymorm rorhu hikneft.
Pitari Jemsre Jonr, Jemsrhu habhir, romrpam husfirparpat kfaknimor.
38 Nd Jairusrhu kunys mwanyaknimomt yimam nur hasomohat.
39 Jisasr kunys fknenihato rim kfo memorm, "Tamohmpno nurwako?
Nd yont nhai nohrfot, be hwitwot!"
40 Jisasr inji kfomotr haningemomr. Nd nur kunys rhuyuk yimam
yak tuhafhato fnah buganimotm, nd yonthu yifammafi turhu husfirpa
disaiperm yaknitarm yimom nd yont rhumo rumtn.
41 Rim fnahnihato nd yonthu tirenr wayekwart kfo kangrt, "Talita
kumi." (Nd mrokfothu yimbu yuhat, "Metene, na kfiwann wasinya.")
42-43 Be nd metent inji kfomotrt yudbat wasinyamotn ufaufaumot.
Yonthu yifammaf inji htihato be tuha yafotha duhatf tohmof. Jisasr
kfo memorf, "You! Mirahfn akfo nuhas mif mifnomm nda nifnhu yont
myenyjwi yuhat." Nd yonenthu gunyjimm 12-pelakfot. Inji kfonihato
kfo memorm, "Nuwa wayak wahefnt."
7.18-23
18 Jisasr memorm, "Nikome ka nhai yima yuhu duhateko? Yima
yuhetko arhuko, to yakrfokomm na pthayuk mrokfefm. Wawanyko! Nd
tng yuhat yiyafoyuk yeshrt o wom tamohm, nhai ndmn Bro Nkifrar
htihato kfo mikahr, 'Ni bi fasoh yimaye.' Nhai.
19 Nd yiyafoyuk yeshrt nhai yima yuhurn yikahm. Nhai. Nd yiyefiwa
yeshrim nyunguram yuhat yitamn ript yihom yorhwom. Ript yihom
rhuhato kto tfit rikunys kitm." Jisasr duka memor, "Tamoh tamoh
yeshrim ye fura bofurayukem." Ndnatn inji kfomorm.
20 Tfit kfo memorm, "Nd yiro yima yuhurio sinyahato newa nefmn,
ndmn Bro Nkifrar htihato kfo kangr, 'Fasoh yimayer.'
21 Nd na kfiwa yima yuhur sinyewa fasoh nefm, ndm inji korhm:
nd fasoh fasoh dukefr, yaum kanjo met yindarim niwa nefm, rikohneft,
yimar nambur sinyahato womr was furaneft, womrhu mettpno rim fnahneft,
22 yimarhu yima yuhur kangr tamoh tamoh wuskam, maruham nanrpayanuhem,
nhai womm henyeft, nd nd fasoh nefm yima yuhur sinyewamn ni womn
yak bebneft womr, kfo nhebehneft, tuhagrhahato yimtna duha na
fura bofuriwa nefm, womrhu dborioh wuskam o mett o tamoht htihato
tfit ni womn duka bebneft womr, 'O tamohmpno ror yekrt nd banuhah
mett o shrt. Nann yakrfoyant.' Ndhtet dukefm o womm faso faso
harhu htfasneft, o yufa yurak htaneft, o duka marnya duha naknita
nefm.
23 Tom nd nd nefmn yiro yima yuhurnio sinyewamn Bro Nkifrar
htihato kfo kangr, 'Fasoh yimayer.' "
9.2-8
Jisasrhu thatipt fnhumo yuhat
2 Kto 6-pela yiham yinyimotm Jisasr Pita Jems Jonrom yaknihato
turpatm muhmom tu mfro wayakmo kminysoftn. Turpatm rhu hasohato
asha htiyaf hanymomr fnhuyaknimor. Memom nndo yindeng nyisofr
fnhutwor.
3 Yimar hmbremo hmbresham rpat fnhu bugaknihato memom nndo
bruwohmr katiwur. Nhai ndar bbinysofthu wom yimar inji rhu wonakrmor.
4 Ee tfit htimomf Iraija Mosesrof Jisasrpno mtohhato pthamohat.
5 Pitar inji htihato Jisasr kfo memorr, "Tisaye, nmoh asha
tohneft hifa. Ka husfirpa kunyenm yimanom nhombrahato singorahnom.
Ninhu womt, Mosesrhu womt, yo Iraijarhu womt."
6 Pitar nd mrokfot kfo pthamohat be yakrmehato be tu furamort
nd mrokfot.
7 Be tfit wom gribfat niamotn yawihnehato kasi hmbremotm. Yiro
nd gribfatn wom tngt niamot. Nd tngt kfo memot, "Ndarr nanhu
Yoner. Be tu marbitn htewanr. Ror pthayuk mrokfom wany yakiokfot."
8 Yudbat yukatoh habri memom ahtinom nd mrokfo pthayuk yimar,
to nhai, nhai wom yimar htirmom. Tu nd Jisasrpar htimom.
12.28-31
Nyingako mtohekwa tu bro boririfhut
28 Jisasri Sadyusim mrokfom nakfo nakfomoahat wom nkifra boririfhuthu
tisar rhuhato wany yakitoh hasomourm. Sadyusim Jisasr kfo ttiwonmoatmr
tfit Jisasr kfo nuhas marnyamourm. Ror inji wany hasohato ttiwon
memorr, "Ndar nom wanuka boririfhum, fitoh boririfhutn nyingako
tohekwat?"
29 Jisasr wanyhato kfo memorr, "Nd nyinga tohekwa boririfhut
inji kfiwut:
'Niko Isrerko wawany marnyako, Bro Nkifrarpar nmoh Nkifrar
rhukfot.
30 Bror ninhu Nkifrayer, ndnatn ninhu yuhuwaf marbi bugam,
ninhu yafothat, yo ninhu yima yuhu bugam
be rorparn htakfot.'
31 Yo ndwom boririfhutne:
'Tunn yak marnyewa kanjo inji womm yak marnyakfot.'
Nd hus boririfhufn tu bro boririfhu mifef."
14.10-11
Judasr kfo fakiomor, Jisasrhu hndhna yuhat
10 Nd yiha 12-pela disaiperroh wom disaiperr kutewumr Judas
Iskeriotr prisroh bro yimampno yimor. Yihato kfo memorm, "Inji
inji hndhnaruhanr."
11 Nd bro prism wanyhato yindhormom. Yindhorhato kfo memomr,
"Maruha hirahnomn." Judasr wanyhato yima yuhur fak nhtamourr
Jisasrhu hndhna yuham.
14.44-46
44 Nd Jisasr hndhnakyuk yimarn bi kfo hta bohta memorm, "Wahtiyafo
hanyswokma. Na yauyaknihato fitoh yimar mkihendhoraknitwa, wamitwako,
tor nd yima Jisasr. Ee inji bi htitwokma, nd yimarn yauyaknihato
yakkfot. Yakhato be yima tire hanyruhakomrn bro yimampno hanykfot."
45 Be nd Jisasr rhumo tkitt mfnah-mohat, Judasr yauyaknimorn
Jisasr rim kihendhoraknihato kfo kangrr, "Tisa."
46 Be yimam yauyaknihato tirtir fakmomr.
15.6-15
Pailatr kfomor Jisasr yura bgre misn anohr
6 Pasofa burwa yiharn kalabus tohyuk wom yimar Judiaroh gafanar
kak thu hnamourr. Tu kmi thofmn fitoh yimar yibonwom yak tuhafoneft,
yufat yutamoatm, nd yimar kak thumour.
7 Nd kalabus htamo yimam gafmanrpno wom yahrt rhumott wom yimam
nambur tonehato yima wasmom. To nd yimam kalabus htamomm. Nd yimaroh
wom yimarhu yufat Barabasr.
8 Nd Pasofakfot yi rifinyuk yimam yi rifiny bugahato Pailatr
kfo memomr, "Ni tu Pasofa yiha na hakuta kanjo hrek inji wana."
9 Pailatr mtohnihato ttiwon memorm, "To finji dukewako? Nda
Judaroh kingr kangko ayak tuhafoya?"
10 Jisasr be prisroh bro yimam kfo wok furahato kalabus htamomr.
Ndnettn Pailatr ndhtet kfo ttiwon mrokfot htamort.
11 Prisroh bro yimam bi kmi thofm kfaf hany memoumm, "Wakfo
naku wameko, 'Pailatr Barabasr ayak hfhanafor.' " Be nd bro prisroh
kfomo yuhat kfo hikmom.
12 Pailatr wanyhato ttiwon memorm, "To nd niko kfo yamuka
Judaroh kingr, nd yimare finji naruhoyanr?"
13 Nd yima rifhur tohmor wanfak wanfak memom, "Bgre misn wakihegirkomr."
14 Pailatr memor, "To tamohmpno? Finji namotr inji naruhoyanr?"
Tfit mrhuni mrhuni memom, "Bgre misn wakihegirkomr."
15 Be Pailatr memor, "Rroh yima yuhum ayak marnyayanm." Ndnatn
Barabasr yak tuhafmorrn tfit Jisasr yakhato soldiaroh tirm htamorr.
Memor, "Romn wife wife tabotakhato bgre misn kihegirrahmr."
15.33-39
Jisasr nohmo yuhat
33 Dany marrn marrhu nukeft be rim nohnimot. Kantri bugat be
yambontift rhumom. Wuroh 3 kilok krif marr tfit niamor.
34 Tri kilok kanjo marr toh hanymor Jisasr tau nakuyafmor,
"Eli, Eli, lema sabaktani?" Nd mrokfothu mrokfo yimbu yuhat
inji kfiwut, "Nkifraye, Nkifraye, tamohmpno bi frtrohwona?"
35 Inji kfo nakumotr brbo tohyuk yimam wanyaf hanyhato kfo
memom, "Nd yimar Iraijar nakutr."
36 Wom yimar toni hanyhato spans yakmorn wainpamn tayifakhato
miyeftn htahato memor, Jisasr hikahta bupam ndtn tmasakrahr. Bupam
hehato kfo memor, "Afo htiyaf hanyrahnom, Iraijar naku kfihat
Iraijar finji naruharr?"
37 Be wuroht tau nakuyafmorn be mfaknimor.
38 Yimar myakni hanymo fijo nd bro rmonthar temperrhu tu Nngrajoh
Hnaru Gnanhehr gna rafomor be buha mifn rmonthar yoh nmbrmorn
mano mano rim rhu mrhumor. Yurak wuyoh nmbrakmorn miyoh nmbr witanihato
mano mano rim hir mhirmor.
39 Jisasrpno brbo tohmo amiroh keptenr Jisas nohmo yuhat htihato
tuha mfha tha duhatr rhumor. Memor, "Dajohmn! To finji tfit kforuhanom?
Ndar yimar tu Bro Nkifrarhu Yon mifer."
15.42-46
Jisasrhu thatipt tahi muhtn rihtamo yuhat
42-43 Judaroh taun Arimateathu wom yimar tohmour. Rorhu yufat
Josefr. Juda kaunserkfot rorn nd kaunserkfot hingrna tohnhomourm.
Bok met yindarim rorhu nefm hifa hti wofnmoumm. Rorhu dukeft duka
memour, "Bro Nkifrarhu kingdomkfot afo nanhu nyingaye afo htiruha!"
Nd dukeftpno tohmour. Nd Fraide yihar, bi tu Judaroh bro rhu krna
Sabat yihar bi rhu yibon hanymomr. Sarere yihar nd rhu krna yihar
rhumoumr. Ndnetrn krifnano Jisasr bi nohetrn nhai wofnrmor Jisasrhu
tfkhat wom rhukfot. Pailatrpno yimorn mtohhato ttiwonmor Jisasrhu
thatipthu yakni yopneft. Nhai yakrmi hanyhato yi mttiwonrmorr.
44 Pailatr Jisasrhu noh mrokfot wanyhato tuha mrokfo duhatr
rhumor. Be yudbat turhu keptenr nakumorr. Memor, "Afo tu keptenrpno
wany marnyaruha Jisasrhu noh mrokfot."
45 Pailatr keptenrpno wany sungunahato ee Josefr kfo fakiowafmorr
Jisasrhu thatipthu yaknineft.
46 Josefr Pailatrhu tngt wany marnya tanyhato yimorn nfri ganyom
rmonthar wiknakmor. Nd nfri rmonthar yak nyingt htatahato Jisasr
bgre miyetr wuyak kasuhakmorrn ganyom rmontharn wahtahato rir
hmbremorr. Rir hmbreyaknihato hanymorr. Hanyhato tahi muhtn rihtamorr.
Nd tahi muhtn htamorrn tahis yakhato tahishu muht hta tittafmort.
16.1-7
Jisasr sinyamo yuhat
1 Nd rhu krna Sabat yihar rhuni bugahato Makdala efkot Mariat
yo Jems Saromerofhu mmem Mariat welpam wiknakhato memof, "Hanyhato
Jisasrhu thatipt gbrorna wunarahnonr."
2 Sande yiha bi dbha ksfutn sinyanihato yimom nd Jisasr rihtamo
tahi muht.
3 Yau hanyhato tfit tuf rinnakfo nakfo hany memouf, "Nd tahi
muht frtasif tanymo tahise frohmn yak rihtaf nuhafruhamno?"
4 Inji nnakfonihato asha mtohhato htimoft nd yonmari tahis
muht frkih tanymot nhai wom rhurmot.
5 Be sfnohtn be yauyaknihato fau fknenimof. Yiro rim tohhato
asha htimofr wom yima damiagr yok thar hmbreyetr tirmifko rhu
hasomor. Be tuha mrokfo duha tohmof.
6 Nd yima damiagr kfo memorf, "Mirahfn afohtasno. Nifn ka
nd bgre mis kihegirmo Nasaret thof Jisasrhu yau hafott niefn.
Nd yimar bi sinyani yifir. Ndart ror yarim htamo tkitt, bi sfnoh
tkit furayet.
7 Waikahfnn turpno yau htfasmoa yimam yo Pitar wakfo wamitwafnm,
Jisasr bi sinyanihato bi Galiliko mtoh gari hanitrm. Tur kfomo
yuhatn Galiliko ndko amhtitwamr."
16.15-16
15 Kfo memorm, "Nikomn ndar bbinysofthu kmi kmim nanhu mrokfot
wakfo nuhashi habri bugatwakomm.
16 Waptha habrikahkomn fitoh yimam wany yakiohato baftais kak
hanitm, nd yimam Bro Nkifrarhu tirtn rhurahm. Yimam nhai wany
yakiokahm nd yimam be bro kotkfot tohrahm.
16.19-20
Bro Nkifrar Jisasr hefenko hamuhmo yuhat
19 Bro Nungothet Jisasr nd mrokfom kfo buganihato be Bro Nkifrar
yakhato hamuhmorr hefenko. Hamuhmorrn turhu bro bbukeft yorhwa
tirmifko fak htamorr.
20 Be Jisasrhu disaiperm kmi kmim yi htfashato Jisasrhu mrokfom
kfo ptha habrimomm. Bro Nungothetr tohnho-moatrm rom pthamoa mrokfem
fipetm rhumoum. Wom wom mirakerkfom rpat hingrna htfasmoum. Ndnatn
rom pthayuk mrokfom wany yakiomoumm.
_____________
Copyright information © Bible League
|
