Jesús - Chatino, Western Highland

1.1
1 Nde ndaʼaǎn chaʼ nu lka suun chaʼ suʼwe ʼin Jesucristo, ska ti nu lka Sñiʼ Ndiose.

1.14-15
Mdyisnan Jesús ngiʼni yu tñan ʼin Ndiose Sti yu nde Galilea
14 Chunʼ ndiʼin la msuʼwa neʼ ʼin Xuwa niʼ ñaʼan chkwan. Bra kanʼ yan Jesús nde lo yuu ʼin Galilea, ngwaʼu yu ʼin neʼ sa ñaʼan lka chaʼ suʼwe ʼin Ndiose.
15 ―Wa ndiya bra chaʼ ka Ndiose ndloo niʼ kasiya ʼin nten ―ndukwin Jesús―. Ka jyuʼu tiʼ wan ʼin nchga chaʼ kuxi nu ndiʼin ʼwan; kulaa yaʼ wan chaʼ kuxi kanʼ, chaʼ ka xñi wan chaʼ suʼwe ʼin Ndiose nu kulaa ʼwan bra kanʼ.

1.21-27
Msñi kwiʼin kuxi ʼin ska yu kiʼyu
21 Chunʼ ndiʼin la ngala taʼa neʼ kichen Capernaum. Xa nu ngwa tsan taʼa nu nxitñaʼ neʼ judío, bra kanʼ ndyaa Jesús niʼ lyaa ʼin neʼ chaʼ kwaʼu yu ʼin neʼ. 22 Bra nu ynan neʼ, yuwe ʼa tiʼ neʼ sa ñaʼan lka chaʼ nu ngwaʼu Jesús ʼin neʼ. Mskeʼ tiʼ neʼ chaʼ tlyu ʼa chabiyaʼ nsuʼwi ʼin yu, chaʼ siʼi sa ñaʼan nchkwiʼ mstru nu nduʼu chaʼ joʼo niʼ lyaa nchkwiʼ yu loʼo nten bra kanʼ. 23 Ti kwiʼ niʼ lyaa kanʼ mdiʼin ska yu kiʼyu nu nsuʼwi kwiʼin kuxi ʼin. Msiʼya ʼa yu ʼin Jesús bra kanʼ:
24 ―¿Ni sa ñaʼan chaʼ nchka tiiʼ chkwiiʼ loʼoǔn?, Jesús Nazaret ―ndukwin yu tiʼí kanʼ―. ¿Ta wa nchka tiiʼ kuʼnii tyii chaʼ ʼñaǎn a? ―ndukwin―. Nsuʼwi lyoǔn ʼiin. Xkwiʼ luwi lka nuʼwin, loʼo Ndiose msuʼwa ʼiin chaʼ ndijyaan lo chalyuu re.
25 Loʼo ja mda ʼa Jesús chabiyaʼ ʼin kwiʼin kuxi nu nsuʼwi ʼin yu tiʼí kanʼ, ngulo yu ʼin kwiʼin kuxi kanʼ chaʼ tyaa siyaʼ ti bra kanʼ.
―¡Ja chkwiiʼ ʼa! ―ndukwin Jesús ʼin kwiʼin kanʼ―. ¡Ja kuʼnii ʼa chaʼ kuxi loʼo yu re!
26 Bra ti mxlyuu kwiʼin kuxi kanʼ ʼin yu tiʼí. Kwen msiʼya yu xa mdoʼo kwiʼin kanʼ, ndyaa bra kanʼ. 27 Ytsen ʼa nchga nten bra kanʼ. Ykwiʼ neʼ loʼo taʼa neʼ:
―¿Ni sa ñaʼan lka chaʼ re a? ―ndukwin neʼ―. ¿Ta xka chaʼ kwi nduʼu yu kwa ʼin nten a? ―ndukwin neʼ―. Nchka ʼin yu kwa kulo yu tñan ʼin kwiʼin kuxi, loʼo ndukwa kwiʼin kanʼ chaʼ nchkwiʼ yu bra kanʼ.

1.32-34
Yʼni Jesús joʼó ʼin kaʼan nten tiʼí
32 Wa msiin ʼa bra kanʼ, loʼo bra wa ndyaa kwichaa, yan loʼo nten ʼin nchga neʼ tiʼí seʼen ndiʼin Jesús, loʼo nten nu msñi kwiʼin kuxi ʼin, loʼo nten nu nsuʼwi xka lo kicha ʼin. 33 Nchga nten kichen kanʼ, wa ndyoʼ tiʼin neʼ tuʼ naʼan tyi Simón bra kanʼ. 34 Yʼni Jesús joʼó ʼin neʼ kanʼ, ni siya kaʼan lo kicha nsuʼwi ʼin neʼ; loʼo nten nu msñi kwiʼin kuxi ʼin, nchkaa neʼ chunʼ ngulo Jesús kwiʼin kanʼ. Ja mda ʼa Jesús chabiyaʼ chkwiʼ kwiʼin kuxi kanʼ, chunʼ wa nsuʼwi lyo kwiʼin kanʼ ʼin Jesús.

2.1-12
Yʼni Jesús joʼó ʼin ska nten nu nchkunʼ ñaʼaan tyukwin yu
1 Wa mdijin chinʼ tsan mxitukwi Jesús ndyaa nde kichen Capernaum kanʼ xiyaʼ. Bra ti nganen chaʼ ñaʼaan kichen chaʼ wa ngala yu. 2 Kanʼ kaʼan ʼa nten mdyoʼ tiʼin seʼen ndiʼin yu; ja ngalaa ʼa niʼ ñaʼan seʼen tyiʼin neʼ, kwiʼ ngwañaʼan tsaa ʼa ndiʼin nten chunʼ naʼan. Loʼo ngwaʼu Jesús chaʼ suʼwe ʼin Ndiose ʼin neʼ bra kanʼ. 3 Loʼo mdiyan jakwa nten bra kanʼ, ngwiʼya neʼ ska yu tiʼí nu nchkunʼ ñaʼaan tyukwin yu. 4 Ja ngwa tiyan neʼ seʼen ndiʼin Jesús loʼo yu tiʼí kanʼ, chaʼ tsaa ʼa ndiʼin nten; kanʼ chaʼ mskwen neʼ ke naʼan loʼo yu tiʼí kanʼ. Lkwa ke naʼan kanʼ, loʼo mslaa neʼ ke naʼan seʼen ndiʼin Jesús chaʼ sten katan seʼen nskwa yu tiʼí bra kanʼ. Kanʼ mbiʼya neʼ ʼin katan nde seʼen ndiʼin Jesús. 5 Bra nu naʼan Jesús chaʼ ndyaa ñaʼan ʼa tiʼ neʼ kwa ʼin yu, bra kanʼ ykwiʼ yu loʼo yu tiʼí kanʼ:
―Wa yʼniǐn chaʼ tlyu tiʼ ʼin kiʼya nu ndiʼin ʼiin, sñiěnʼ ―ndukwin Jesús ʼin yu.
6 Loʼo mstru nu nduʼu chaʼ joʼo niʼ lyaa nu mdiʼin niʼ ñaʼan kanʼ, yuwe ʼa tiʼ neʼ bra kanʼ: 7 “¿Ni chaʼ ykwiʼ yu re ngwañaʼan?” mskeʼ tiʼ neʼ kanʼ. “Ska ti Ndiose ka kuʼni Ni chaʼ tlyu tiʼ ʼin nten nu ndukwi kiʼya. Ska kiʼya tnun lka chaʼ ykwiʼ yu kiʼyu re chaʼ kuʼni tyii yu kiʼya nu ndiʼin ʼin ska nten chalyuu, chaʼ ja tukwin nchka ʼin kuʼni tyii kiʼya nu ndiʼin ʼin nten.” 8 Ngwiʼya Jesús kwenta sa ñaʼan lka chaʼ nu ndaʼan tiye neʼ, kanʼ chaʼ ykwiʼ yu loʼo mstru kanʼ bra kanʼ:
―¿Ni sa ñaʼan chaʼ kuxi ndaʼan chaʼ tiye wan seʼen ndiʼin wan a? ―ndukwin Jesús ʼin mstru kanʼ―. 9 Ja ndiya tiʼ wan chaʼ nu wa mxkweěn ʼin yu tiʼí re: “Wa yʼniǐn chaʼ tlyu tiʼ ʼin kiʼya nu ndukwii.” ¿Ta suʼwe la chkwiǐnʼ xka chaʼ re loʼo yu tiʼí sikwa a?: “Tyituun, tyaa loʼo katan ʼiin naʼan tyii” ―ndukwin Jesús―. 10 Suʼwe sikwa. Nchka tiǎnʼ chaʼ ka biyaʼ tiʼ wan chaʼ ndiya chabiyaʼ ʼñaǎn chaʼ kuʼniǐn chaʼ tlyu tiʼ ʼin nten chalyuu nu ndukwi kiʼya; ndiya chabiyaʼ ʼñaǎn, chunʼ wa msuʼwa Ndiose ʼñaǎn ndijyaǎn lo chalyuu chaʼ kaǎn nten. Ka biyaʼ tiʼ wan bra nu ñaʼan wan chaʼ chkaa yu tiʼí re ni ―ndukwin Jesús.
Loʼo xiyaʼ ykwiʼ yu loʼo yu tiʼí bra kanʼ:
11 ―Kuloǔn tñan ʼiin ni ―ndukwin Jesús ʼin yu―. Tyituun, tsaa loʼo katan ʼiin naʼan tyii.
12 Bra ti mdyituun nu tiʼí kanʼ, msñi katan ʼin, mdoʼo ndyaa bra kanʼ. Naʼan nchga nten chaʼ mdoʼo nu ngwa tiʼí kanʼ ndyaa loʼo katan ʼin. Loʼo yuwe ʼa tiʼ neʼ bra kanʼ, yʼni tnun neʼ ʼin Ndiose chaʼ ngwa chaʼ tnun kanʼ:
―Ja ska yaʼ ñaʼan ba ska chaʼ tnun sa ñaʼan nu yʼni yu ni ―ndukwin neʼ ʼin Ndiose bra kanʼ.

4.35-41
Ngulo Jesús tñan ʼin kwiʼin loʼo ʼin kulooʼ lo tiyuʼ
35 Wa msiin ʼa tsan kanʼ, wa ndyaa kwichaa, bra kanʼ ykwiʼ Jesús chinʼ loʼo neʼ nu ngiʼni xaʼan chaʼ ʼin yu:
―Tyijian tyaan nde xka laʼa tsuʼ tiyuʼ re ―ndukwin Jesús ʼin neʼ kanʼ.
36 Loʼo ngulaa tiʼin neʼ ʼin nten kaʼan nu ndiʼin nde kwa bra kanʼ, yten taʼa ndaʼan Jesús niʼ yka naʼan seʼen ndiya yu, seʼen ngwaʼu yu chaʼ ʼin nten kaʼan kanʼ ti tsan la. Mdoʼo neʼ ndyaa neʼ, loʼo xka la yka naʼan ndyaa suʼwa ti. 37 Loʼo lye ʼa mskwa kwiʼin bra kanʼ, lye ʼa ngutsa tyiʼa lo tiyuʼ, sa yaʼ nu yten ʼa tyiʼa kulooʼ niʼ yka naʼan; wa xaʼan ti yka naʼan kanʼ nsuʼwi tyiʼa. 38 Lajaʼ ti Jesús mskwa yu tu seʼen yka naʼan, mskwa ke yu lo ska teʼ kuti ti. Mlyo neʼ slaa yu bra kanʼ:
―¡Yu kula! ―ndukwin neʼ ʼin Jesús―. ¡Xaa tiiʼ! ¿Ta ja nduwe tiiʼ chaʼ wa kaja tian a? ―ndukwin neʼ―. Wa katin ti yka naʼan re niʼ tyiʼa.
39 Bra kanʼ mdyituun Jesús, ngulo yu tñan ʼin kwiʼin, ykwiʼ yu loʼo kwiʼin chaʼ ja ka kulooʼ lo tyiʼa tiyuʼ kanʼ.
―¡Ka tiin lo tyiʼa re! ―ndukwin yu.
Bra ti ngwa tiin kwiʼin, ngwa tiin kulooʼ; tiin ti nganun tiyuʼ bra kanʼ. 40 Kanʼ ykwiʼ Jesús loʼo neʼ nu ngiʼni xaʼan chaʼ ʼin yu:
―¿Ni chaʼ ntsen ʼa wan? ―ndukwin Jesús ʼin neʼ―. ¿Ni chaʼ ja ndyaa ñaʼan tiʼ wan ʼin Ndiose chaʼ ka ʼin Ni kuʼni Ni ngwañaʼan? ―ndukwin yu.
41 Yuwe ʼa tiʼ neʼ ñaʼan neʼ ʼin Jesús bra kanʼ:
―¿Ti ka nu lka yu kiʼyu re? ―ndukwin neʼ ʼin taʼa neʼ―, chaʼ loʼo kwiʼin ndukwa chaʼ nu ykwiʼ yu loʼo ran, loʼo tyiʼa tiyuʼ ynan chaʼ kanʼ ―ndukwin neʼ ʼin taʼa ndaʼan neʼ.

5.22-24
22 Kanʼ mdiyan ska yu kiʼyu nu lka yu tñan niʼ lyaa kwa. Jairo naan yu kula kanʼ. Mduun xtyinʼ yu kula kanʼ tloo Jesús, mdukwi ndlyuu ke yu la lyuu. 23 Tʼnan ʼa ykwiʼ yu loʼo Jesús bra kanʼ:
―Wa kaja ti sñiěnʼ ―ndukwin yu ʼin Jesús―. Kuʼni wan chaʼ suʼwe tsaa wan nde seʼen nskwa nu kunaʼan xuwe kanʼ ʼñaǎn, chaʼ kuʼni wan joʼó ʼin, xtya yaʼ wan chunʼ nu xuwe chaʼ kuʼu.
24 Loʼo ndyaa Jesús loʼo yu bra kanʼ, loʼo kaʼan nten ndyaa loʼo neʼ, tsaa ʼa ndiʼin nten tuwiin seʼen ndaʼan neʼ.

5.35-42
35 Bra nu ti nchkwiʼ Jesús loʼo nu kunaʼan kanʼ, bra kanʼ mdiyan ska msu ʼin Jairo, yu kula nu lka tñan niʼ lyaa kanʼ, mdyukwa taʼa loʼo neʼ. Ykwiʼ msu kanʼ loʼo Jairo chaʼ ʼin nu xuwe tiʼí:
―Wa ngujwi sñiʼ wan, yu kula ―ndukwin msu ʼin xʼnan―. Ja ndiʼin chaʼ chkwiʼ la wan loʼo mstru re.
36 Loʼo Jesús, ynan yu chaʼ nu ykwiʼ msu kanʼ, loʼo ja mdukwa Jesús ʼin ran bra kanʼ.
―Ja kutseen ―ndukwin Jesús ʼin yu kula nu lka tñan niʼ lyaa kanʼ―. Sa kanʼ ti chaʼ, kuʼnii chaʼ tsaa ñaʼan tiiʼ ʼñaǎn.
37 Loʼo ja mda ʼa Jesús chabiyaʼ ʼin nten chaʼ tsaa neʼ loʼo yu; ska ti Tyu, loʼo Santiago, loʼo Xuwa taʼa Santiago, mda yu chabiyaʼ tsaa neʼ loʼo yu. 38 Kanʼ mdiyan neʼ tuʼ naʼan tyi yu nu lka tñan niʼ lyaa kanʼ. Wa kaʼan ʼa nten mdyoʼ tiʼin nde kwa, nganan ʼa neʼ ndiʼin neʼ. Lye ʼa ngwa chaʼ wa ngujwi nu xuwe ti kanʼ. 39 Yten Jesús niʼ ñaʼan bra kanʼ.
―¿Ni chaʼ lka nganan ʼa wan ndiʼin wan? ―ndukwin Jesús ʼin neʼ―. ¿Ni chaʼ lka chaʼ kaʼan ʼa chaʼ ndaʼan tiye wan? Ja ngujwi nu xuwe tiʼí re, nan lajaʼ ti nskwa ―ndukwin Jesús.
40 Loʼo mstyi lyoʼo ʼa neʼ ʼin yu bra kanʼ. Kanʼ chaʼ ngulo Jesús ʼin nchga nten nu ndiʼin nxiʼya neʼ; nganun yu loʼo sti loʼo jyaʼan nu xuwe tiʼí, loʼo taʼa snan yu taʼa ndaʼan Jesús, ndyaa neʼ kanʼ seʼen ndiʼin nu xuwe. 41 Bra kanʼ msñi Jesús yaʼ nu xuwe kanʼ:
―Talita, kumi ―ndukwin Jesús ʼin, chaʼ nu nchkwiʼ neʼ kanʼ. Nde lka sa ñaʼan ndyoʼo chaʼ kanʼ: ―Maan, kuloǔn tñan ʼiin ni, chaʼ tyituun.
42 Bra ti mdyituun nu kunaʼan xuwe nu ngujwi kanʼ, mdyisnan ndaʼan bra kanʼ. Tii tyukwa ti yijan nsuʼwi nu xuwe ti kanʼ. Yuwe ʼa tiʼ neʼ kanʼ bra kanʼ. 43 Loʼo lye ykwiʼ Jesús loʼo neʼ kanʼ, chaʼ ja katsaʼ neʼ ʼin xka la nten sa ñaʼan ngwa chaʼ nchkaa nu xuwe kanʼ. Bra kanʼ ngulo yu tñan ʼin neʼ chaʼ ta chinʼ nan ku nu xuwe ti kanʼ.

7.18-23
18 ―¿Loʼo ʼwan, ja ngwa biyaʼ tiʼ wan chaʼ kanʼ a? ―ndukwin Jesús ʼin neʼ kanʼ―. ¿Ja jlyo tiʼ wan chaʼ siʼi nan nu kuan nu kuʼni chaʼ ka kuxi tiyean a? Ja ka ʼin ran. 19 Bra nu kuan ska nan, bra kanʼ sten nan kanʼ tu tuʼwaan, ka tiʼin ran kanʼ nde nianʼ bra kanʼ; xa nu tsaan liyaʼ, tyii ji chaʼ ʼin ran bra kanʼ ―ndukwin Jesús.
Ngwañaʼan ykwiʼ Jesús chaʼ ka biyaʼ tianʼ chaʼ suʼwe kuan nchga nan nu nchku nten. 20 Ti ngwaʼu la Jesús ʼin neʼ kanʼ bra kanʼ:
―Chaʼ nu wa ykwiʼ ska nten, chaʼ nu wa yʼni ska nten, chunʼ chaʼ kanʼ ka biyaʼ tianʼ bra nu nsuʼwi chaʼ kuxi niʼ kasiya ʼin neʼ kanʼ. 21 Bra nu chañi chaʼ nsuʼwi chaʼ kuxi niʼ kasiya ʼin nten, kaʼan ʼa chaʼ kuxi kuʼni neʼ kanʼ bra kanʼ: xuʼwi chaʼ ʼin neʼ loʼo kwilyoʼo xka nten, kuʼni neʼ chaʼ chen ñaʼan loʼo xka nten, kujwi neʼ ʼin taʼa neʼ, 22 kuʼni neʼ kunan chaʼ nu nsuʼwi ʼin taʼa nten neʼ, xitukwi tiʼ neʼ ʼin ska nan nu nsuʼwi ʼin xka nten, ka tiʼí tiʼ neʼ ʼin taʼa nten neʼ, tukwa chaʼ ka tiye neʼ, xaʼan ʼa kuʼni neʼ, ka liyeʼ tiʼ neʼ, kwentu ʼa ka neʼ, siyeʼ ʼa chkwiʼ neʼ, loʼo ja ska chaʼ kuwe tiʼ neʼ siyaʼ ti. 23 Nchga chaʼ kuxi kanʼ wa nsuʼwi tiye nten, kanʼ chaʼ ndiya tiʼ neʼ kuʼni neʼ chaʼ kuxi kanʼ. Kanʼ lka chaʼ kuxi nu ngiʼni nten chalyuu chaʼ ja luwi kasiya ʼin neʼ.

9.2-8
Wa mxaʼan tyukwi ñaʼaan Jesús loʼo steʼ yu mduun yu loʼo neʼ
2 Xa wa mdaʼa skwa tsan, mdoʼo Jesús ndyaa bra kanʼ; loʼo Tyu, loʼo Santiago, loʼo Xuwa ndyaa loʼo yu. Jakwa ti neʼ kanʼ ndyaa neʼ lo kiʼya kwan, ja loʼo xka nten ndyaa neʼ. La kanʼ, laja nu naʼan neʼ ʼin Jesús, wa mxaʼan tyukwi ñaʼaan yu. 3 Naʼan neʼ chaʼ luwi ʼa steʼ Jesús, ngaten ʼa ñaʼan ran. Ja nchka ʼin ska nten chalyuu jyaʼan teʼ ngwañaʼan, ni siya jlyo ʼa tiʼ neʼ sa ñaʼan katen teʼ. 4 Laja nu naʼan neʼ kanʼ, mdoʼo tukwa ayman Elías loʼo ayman Moisés, mduun ayman kanʼ nchkwiʼ neʼ loʼo Jesús. 5 Bra kanʼ ykwiʼ Tyu loʼo Jesús:
―Mstru ―ndukwin―, ¡suʼwe ʼa chaʼ ndiʼin ba loʼoo nde re! Taa chabiyaʼ kwiñan ba snan teʼ naʼan, ska ka seʼen tyiʼin ykwiʼ nuʼwin, xka ka seʼen tyiʼin niMoisés, xka ka seʼen tyiʼin niElías ―ndukwin Tyu ʼin Jesús.
6 Ytsen ʼa Tyu loʼo taʼa ndaʼan yu, kanʼ chaʼ ja jlyo ʼa tiʼ yu sa ñaʼan ngwa chaʼ nu ykwiʼ yu. 7 Loʼo mdoʼo tukwa ska koo nu yuʼwi nchga seʼen nduun neʼ bra kanʼ, kwiʼ ynen laja koo kanʼ nchkwiʼ Ndiose loʼo neʼ:
―Ti kwiʼ yu re lka ska ti nu lka Sñiěnʼ ―ndukwin Ndiose―, ndiya ʼa tiǎnʼ ʼin yu re. Kunan suʼwe wan ʼin yu re bra nu chkwiʼ yu loʼo wan.
8 Bra ti naʼan neʼ seʼen mduun ayman kanʼ nu ngwa tsan, naʼan neʼ chaʼ ja ndiʼin ʼa neʼ kanʼ ni; siyaʼ ti nduun snan neʼ nu ngiʼni xaʼan chaʼ ʼin Jesús loʼo ti kwiʼ Jesús.

12.28-31
Tñan nu ndloo la ʼñaan chaʼ kuʼnian chaʼ ʼin Ndiose
28 Loʼo mdiyan ska mstru nu nduʼu chaʼ joʼo nde seʼen ndiʼin Jesús bra kanʼ. Wa ynan mstru kanʼ bra nu mxkwen neʼ kanʼ ʼin Jesús, sa ñaʼan ngwa chaʼ suʼwe ʼa ykwiʼ Jesús loʼo neʼ. Loʼo mnichaʼ mstru kanʼ ʼin Jesús bra kanʼ:
―Taʼa tñan nu ngulo Ndiose ʼñaan chaʼ kuʼnian ni, ¿ni sa ñaʼan tñan lka nu ndloo la ʼñaan chaʼ kuʼnian a? ―ndukwin yu ʼin Jesús.
29 Bra kanʼ mxkwen Jesús ʼin mstru kanʼ:
―Chaʼ nu ndukwa kulo la, kanʼ lka re: “ʼWan neʼ Israel, kunan suʼwe wan ni: Ska ti Ndiose lka Xʼnaan. 30 Ndiʼin chaʼ tyukwi ti tiye wan tyiʼin chaʼ ʼwan loʼo Ndiose nu lka Xʼnan wan; ndiʼin chaʼ ka luwi kasiya ʼwan, kwiʼ tyiʼin chaʼ ʼwan loʼo Ndiose loʼo nchga chaʼ tiya nu ndiʼin ke wan, sa ñaʼan yaʼ nu ka ʼwan tyiʼin chaʼ ʼwan loʼo Ni” ―ndukwin Jesús ʼin yu―. 31 Kwiʼ ngwañaʼan ndukwa xka chaʼ: “Chka tʼnan tiʼ wan ʼin taʼa nten wan sa ñaʼan ka bra nu nchka tʼnan tiʼ wan ʼwan, ti ykwiʼ ti wan.” Ja ndiya xka tñan nu ndloo la ʼñaan chaʼ kuʼnian, ska lo ti tñan re ―ndukwin Jesús.

14.10-11
Yʼni Juda trisiyun ʼin Jesús yaʼ nten xaʼan
10 Loʼo Juda Iscariote ni, ti kwiʼ taʼa yu loʼo nu ngiʼni xaʼan chaʼ ʼin Jesús lka yu kanʼ. Bra kanʼ mdoʼo Juda kanʼ ndyaa yu seʼen ndiʼin sti joʼo nu lka ndloo la, chaʼ kujwiʼ xuʼwa yu ʼin Jesús yaʼ neʼ kanʼ. 11 Suʼwe ʼa ngwa tiye neʼ nu tnun nchka kanʼ xa nu ynan neʼ chaʼ nu ykwiʼ Juda loʼo neʼ, kanʼ chaʼ ykwiʼ neʼ tnun kanʼ loʼo yu chaʼ ta neʼ tñi ʼin yu. Bra kanʼ mdyisnan Juda ndyaa naan yu ni bra ka nu ta yu ʼin Jesús yaʼ neʼ xaʼan kanʼ.

14.44-46
44 Juda nu wa ta ti ʼin Jesús yaʼ nten xaʼan kanʼ, wa ykwiʼ yu loʼo neʼ tlá kanʼ nu ngwa tsan, ytsaʼ yu sa ñaʼan nu kuʼni yu:
―Chkwichaǎnʼ kijin skaʼ yu kiʼyu kanʼ ―ndukwin Juda ʼin neʼ tlá―. Xñi lya wan ʼin yu bra kanʼ, yaa loʼo lya wan ʼin yu kanʼ ―ndukwin yu ʼin neʼ.
45 Kanʼ chaʼ ndijyan Juda, bra ndyaa yu seʼen nduun Jesús chaʼ chkwichaʼ yu skaʼ Jesús:
―¿Nde ti nduun, mstru? ―ndukwin Juda ʼin Jesús.
Ykwichaʼ Juda skaʼ Jesús bra kanʼ. 46 Bra ti msñi neʼ tlá ʼin Jesús, chaʼ tyaa loʼo neʼ ʼin yu bra kanʼ.

15.6-15
Ngulo Pilato tñan chaʼ kujwi neʼ ʼin Jesús
6 Nchga yijan xa nu ndiya tsan taʼa kanʼ, ndlaa nu lka gobernador ska ti presu, sa ñaʼan presu nu jñan neʼ judío ʼin yu. 7 Loʼo nsuʼwi tyun nten niʼ ñaʼan chkwan yijan kanʼ, neʼ nu wa yjwi ʼin neʼ romano, neʼ xka laʼa tsuʼ nu ngwa ndloo kanʼ bra nu msuun neʼ loʼo. Ska presu kanʼ lka Barrabás. 8 Bra kanʼ mdyoʼ tiʼin kaʼan nten tloo Pilato, mjñan neʼ ʼin yu chaʼ kulaa yu ʼin ska presu sa ñaʼan nu ngiʼni yu nchga yijan.
9 ―¿Ta nchka tiʼ wan chaʼ kulaǎn ʼin yu re nu lka ree ʼwan, neʼ judío a? ―mnichaʼ Pilato ʼin nten kaʼan kanʼ.
10 Ykwiʼ Pilato ngwañaʼan chunʼ mgii tiʼ yu chaʼ tiʼí tiʼ sti joʼo nu lka ndloo ʼin Jesús, kanʼ chaʼ mdiyan loʼo neʼ ʼin Jesús tloo yu chaʼ lka yu gobernador. 11 Mjñan nten kaʼan ʼin Pilato chaʼ kulaa yu ʼin Barrabás, siʼi ʼin Jesús. Nan wa ykwiʼ nten kaʼan kanʼ loʼo Pilato chaʼ kulaa ʼin Barrabás, chunʼ mdatsaa sti joʼo nu lka ndloo ʼin nten chaʼ ngwañaʼan jñan neʼ chaʼ ʼin Pilato. 12 Xiyaʼ mnichaʼ Pilato ʼin neʼ bra kanʼ:
―¿Ni sa ñaʼan kuʼniǐn loʼo yu re, nu ykwiʼ wan chaʼ lka yu ree ʼin neʼ judío sikwa a? ―ndukwin Pilato ʼin nten kaʼan kanʼ.
13 Kwen msiʼya loʼo neʼ ʼin Pilato bra kanʼ:
―¡Kujwi lya wan ʼin yu kwa lo wsi! ―ndukwin neʼ.
14 ―¿Ni chaʼ nchka tiʼ wan chaʼ kujwiǐn ʼin yu re? ―ndukwin Pilato ʼin neʼ―. ¿Ni ñaʼan kiʼya ndiʼin ʼin yu a?
Lye la msiʼya loʼo neʼ ʼin Pilato bra kanʼ:
―¡Kujwi lya wan ʼin yu kwa lo wsi!
15 Kanʼ chaʼ ngulaa Pilato ʼin Barrabás chaʼ kiʼya tlaʼ chinʼ tiye nten kaʼan kanʼ. Xa nu lye mjiʼin sndaru ʼin Jesús loʼo ti su, bra kanʼ ngulo Pilato tñan ʼin sndaru chaʼ tyaa loʼo neʼ ʼin Jesús chaʼ jwiʼin kaʼan neʼ ʼin yu lo wsi.

15.33-39
Ngujwi Jesús
33 Xa nu ndiʼya kwan ngwa tla xaa ñaʼaan chalyuu. Snan bra mdaloo chaʼ tla xaa. 34 Loʼo bra wa snan siin, bra kanʼ kwen msiʼya Jesús:
―Eloi, Eloi, ¿lama sabactani? ―ndukwin. Nde ñaʼan ndyoʼo chaʼ kanʼ chaʼtñan: Ndiose ʼñaǎn, Ndiose ʼñaǎn, ¿ni chaʼ ngulaa yaaʼ ʼñaǎn?
35 Ynan chinʼ nten nu nduun kwiʼ seʼen ti, loʼo ja ngwa biyaʼ tiʼ neʼ ni chaʼ ngwa nu ykwiʼ yu:
―Kunan suʼwe wan, wa msiʼya yu ʼin ayman Elías ―ndukwin neʼ kanʼ.
36 Kanʼ msnan ska nten ndyaa ʼya yu ska kiche; mchaʼ yu ʼin kiche kanʼ loʼo mñun tiyeʼ bra kanʼ, mskwen yu ʼin ran kijin tuʼwa Jesús loʼo ska yka ti chaʼ koʼo Jesús, ngwa tiʼ yu.
―Kataan chinʼ ―ndukwin nten kanʼ―, ñaʼaan si kan ayman Elías chaʼ tiʼya ʼin Jesús re lo wsi.
37 Loʼo kwen msiʼya Jesús, ngujwi bra kanʼ. 38 Bra ti mdaaʼ teʼ tnun nu ndukwi loo joʼo niʼ lyaa tnun kanʼ. Nde kwan mdyisnan mdaaʼ teʼ kanʼ sa ñaʼan yaʼ mdaaʼ ran la lyuu. 39 Loʼo capitán romano nu ngwa ndloo ʼin sndaru nu nduun seʼen ngaʼan Jesús, wa naʼan capitán kanʼ sa ñaʼan yʼni Jesús bra nu ngujwi yu.
―Chañi chaʼ Sñiʼ Ndiose nu lka ndloo la ti lka ayman re ―ndukwin capitán kanʼ.

15.42-46
Mtsiʼ ayman Jesús
42 Wa kiʼya ti tla, ti kwiʼ tsan taʼa siin ngwa kanʼ, loʼo la xka tsan ka tsan nu xitñaʼ neʼ judío. 43 Mdiya ska neʼ wsiya nu naan Se, neʼ kichen Arimatea ngwa yu kanʼ, ska neʼ kula nu tnun nchka ngwa yu. Loʼo Se ndyaa ñaʼan ʼa tiʼ yu chaʼ wa tiya ti tsan chaʼ ka Ndiose ndloo la; kanʼ chaʼ yʼni ngula tiye yu, ndyaa yu tloo Pilato mjñan yu chabiyaʼ kutsiʼ yu ʼin ayman Jesús. 44 Yuwe ʼa tiʼ Pilato si chañi chaʼ ngujwi Jesús ndla ti. Kanʼ chaʼ msiʼya Pilato ʼin capitán ʼin sndaru nu nduun kwan kiyaʼ wsi chaʼ kan capitán kanʼ tloo yu, chaʼ katsaʼ ñi ʼin yu si chañi chaʼ ngujwi Jesús. 45 Loʼo ytsaʼ capitán kanʼ ʼin Pilato chaʼ chañi ngujwi ayman kanʼ; kanʼ chaʼ mda Pilato chabiyaʼ ʼin Se chaʼ tsaa loʼo yu ʼin ayman kanʼ, chaʼ katsiʼ. 46 Bra ti ngwiʼya Se ska teʼ suʼwe ʼa ñaʼan; mdiʼya yu kula ʼin ayman kanʼ, mxiin yu teʼ kwi chunʼ ayman. Bra kanʼ ndyaa loʼo yu ʼin ayman ska tukee nu wa ngulu yu siʼ yuu, mtsiʼ yu ʼin ayman Jesús niʼ tukee kanʼ. Bra kanʼ mxlyuu yu ska kee tnun tuʼwa tukee kanʼ, tsaa mchkunʼ neʼ tuʼwa kee kanʼ bra kanʼ.

16.1-7
Ndyuʼu Jesús xiyaʼ
1 Bra wa mdyii tsan nu nxitñaʼ neʼ judío, loʼo Liya Magdalena loʼo Liya jyaʼan, Santiago loʼo Salomé, ndyaa neʼ msiʼi neʼ sete xi tyiʼi. Kanʼ ndyaa loʼo neʼ ʼin sete kanʼ, chaʼ taʼan ran ñaʼaan chunʼ ayman Jesús, ngwa tiʼ neʼ. 2 Wa ngwiʼya xaa xka tsan bra kanʼ, tsan kulo ʼin smnan. Bra nu ndyoʼo tukwa kwichaa, bra ti mdoʼo neʼ kunaʼan kanʼ ndyaa neʼ seʼen nsu ayman Jesús tukee kanʼ. 3 Laja nu mdaʼan neʼ tuwiin ykwiʼ neʼ loʼo taʼa neʼ:
―¿Ti ka nu ka tayaʼ ʼñaan chaʼ kulo tsuanʼ kee tnun nu nchkunʼ tuʼwa tukee kanʼ a? ―ndukwin neʼ ʼin taʼa neʼ.
4 Bra wa mdiyan neʼ kwiʼ seʼen ti, naʼan neʼ tukee kanʼ, chaʼ wa mdoʼo tsuʼ kee tnun nu nchkunʼ tuʼwa tukee bra kanʼ; ndukwa laa tuʼwa tukee kanʼ bra kanʼ. 5 Yten neʼ niʼ tukee, naʼan neʼ ska yu kiʼyu kuneʼ, mskeʼ tiʼ neʼ; ngaten ʼa teʼ tyukwin nu nchkuʼ yu kiʼyu kanʼ, ndukwa laʼa seʼen kwin seʼen ysu ayman kanʼ nu ngwa xkanʼ. Yuwe ʼa tiʼ neʼ kunaʼan kanʼ ñaʼan neʼ ʼin yu.
6 ―Ja kutsen wan ―ndukwin yu kiʼyu kanʼ ʼin neʼ kunaʼan kanʼ―. Wa jlyo tiǎnʼ chaʼ ndaʼan naan wan ʼin Jesús Nazaret nu yjwi neʼ lo wsi. Ja nsu ayman kanʼ nde re, chaʼ wa ndyuʼu yu kanʼ xiyaʼ. Kan wan nde re, ñaʼan wan chinʼ seʼen mstya neʼ ʼin ayman kanʼ. 7 Bra kanʼ yaa lya wan katsaʼ wan chaʼ re ʼin Tyu loʼo ʼin ñaʼaan ta neʼ nu ngiʼni xaʼan chaʼ ʼin yu: “Wa tsaa ti yu, ti ykwiʼ ti yu, nde Galilea nde loo la ʼwan; nde kwa tyukwa taʼa wan ʼin yu, sa ñaʼan nu wa ndukwin yu ʼwan nu ngwa xkanʼ”.

16.15-16
15 ―Tsaa wan tyukwi ñaʼaan lo chalyuu ―ndukwin Jesús ʼin neʼ bra kanʼ―. Katsaʼ wan chaʼ ʼñaǎn ʼin nchga nten. Chkwiʼ wan loʼo nten chaʼ wa yʼniǐn tñan lo wsi chaʼ ka lyaa neʼ ʼin nchga chaʼ kuxi. 16 Xa nu sten nten chaʼ ʼñaǎn, tyukwatya neʼ chabiyaʼ ʼñaǎn bra kanʼ, tyoʼo laa neʼ kanʼ ʼin chaʼ kuxi bra kanʼ. Nten nu ja xlyaa sten chaʼ ʼñaǎn siyaʼ ti, kanun kiʼya ʼin neʼ bra kanʼ.

16.19-20
Ndyaa Jesús nde niʼ kwan
19 Bra wa mdyii ykwiʼ Jesús nu lka Xʼnaan, bra kanʼ yʼni Ndiose chaʼ mchkwen yu ndyaa yu nde niʼ kwan; ndyaa tukwa Jesús laʼa seʼen kwin ʼin Ndiose la kanʼ. 20 Loʼo mdoʼo neʼ nu wa yʼni xaʼan chaʼ ʼin Jesús ndyaa neʼ bra kanʼ, nchga kichen ykwiʼ neʼ chaʼ ʼin Ni loʼo nten. Lye ʼa mdayaʼ Xʼnaan ʼin neʼ, chaʼ ngwa biyaʼ suʼwe tiʼ nten nchga kichen seʼen ndyaa neʼ kanʼ, chaʼ chañi ʼa chaʼ ʼin Ndiose nu ngwaʼu neʼ; ngwa biyaʼ tiʼ nten kichen kanʼ xa nu naʼan neʼ chaʼ tnun nu yʼni neʼ kanʼ chabiyaʼ ʼin Ndiose.
Ngwañaʼan ka chaʼ.