Jesús - Seri

1.1
Juan ano cotiistim quij hehe an com ano tatax Yooz quih iitom quih cömacoaat
1 Hizaax icaitom quih quiipe yeeno caap quih iti mota iitax chaaha. Jesucristo Yooz quij asaac icp ac czaxöiha.

1.14-15
Jesús cop yaticpan ac iti mitoozi cöihacatax ac haaha
14 Ox tpactama Juan ano cotiistim quih hen itcaitajcma Jesús quih hant Galiléa ac ano yoofp. Icaitom quih quiipe quih Yooz quij iti moca ac xica quih quiistox com cöiyaqueexot Yooz quij xica quih quiistox com an ihimoz quih iti cöisa xah ac. 15 Jesús quij taitom ox mee:
―Hooctam. Yooz quij xica quih quiistox com ziix quih iti cöitapacta cöeaal ac taax cöisacoohotim tama hiz cöcahcaha. Taaxah oo cötpactama ziix quih mizj hant imap quih mayaaizi cop mihiistox com hanaailcoj ―ox mee.

1.21-27
Ctam iquiisax imiipe zo oah zo toc cöyiij
21 Ox tpactama hezitim Capernáom quij ano tazcamma zaah it hant icooca cop cötafpma Jesús quih jodíoj coi haaco caacoj ano ptiti pte toii yaza cop an cötazquim Yooz quij iitom quih cöiyaqueexot. 22 Ziix quih ziix quih cöiseaal ac quih iti cöhapacta taax itmis Yooz quij iitom quih cöiyaqueexot. Icaitom quih jodíoj coi cöiyahihj ac cöcacoaaj coi ziix quih cöiyaqueexoj ac taax immisiha. Taax oo cötpactama Jesús quij ziix quih haqueexot ac hax imameepto. 23 Ox tpactama jodíoj coi haaco caacoj ano ptiti pte toii yaza cop ctam iquiisax imiipe zo oah zo toc cötiij teenj ox iyoi:
24 ―¿Zo tpactama oo hizi ntahaaha Jesús hezitim Nasarét ac ano cmique? ¿Me he hant com he sahinej queeya hino ntmita? He mizj ihmiiya me cömihaa ac. Me Yooz quij ziix zo yahaa chaaha ―ox iyoi.
25 Ox tpactama Jesús quih hanso itaxnij ox iyoi:
―¡Ihmai ihmai! ¡Isoj quij caiix! ―ox iyoi.
26 Ox tpactama iquiisax imiipe quih iisax itacactimma tipon taixajma isoj com iyoiix. 27 Ox tpactama xica quih quiistox coi tcoo iistox com iti contoplipiho ihameept quih iti cöiizquim caha hipi pte immiiitim ox yaza:
―¿Az haxehe iti cöhapactaya? ¡Ziix quih icacoaat ac cmaa quiihihi! ¡Toc cöihcaii ac itcommisiho! Ctam ticop ziix quiti cooyam quih cöihaa ac iquiistox quih imiipe quih itaaal mos iitom quih iti maaizi ―ox tooza hipi pte immiiitim.

1.32-34
Jesús cop xica quih quiistox quih catxo cmoqueept coi cöihahiipet ac
32 Ox tpactama zaah quij ano tazquimma xica quih quiistox quih hezitim tiquij iti coii quih cmoqueept coi xah iquiistox quih imiipe quih oai xah tcooma Jesús quih cöiyoomlajc. 33 Xica quih quiistox quih hezitim quij iti coii quih tcoo Jesús quih haaco an ihiij cop hahoot ac cöyoozcam. 34 Jesús quij ziix quih pti immis quih cocmoqueept quih anxö itahiipet iquiistox quih imiipe quih anxö cöimacoiix. Ox oo mpacta xo iquiistox quih imiipe coi yaza quih iqui itcmacatxiho. Ziix chaa quih ocoaajiha taaxah aa itahma.

2.1-12
Jesús cop ziix icasiijim imaa zo cöihahiipet ac

1 Ox tpactama zaah quih quipxao iti toofinma Jesús quih hezitim Capernáom quij cötiin ano tafp haaco z ano tiij toc cötiijma tahac iti cöihiij ac iyoomxoj. 2 Hoox xah teme xica quih quiistox quih tatxo hant ac iti pte yaii. Iitxo cah ipimax hant iti soii ipi zo toc yomahca. Hahoot ac mos taanim toc cöyoohca. Jesús cop taax iti taap Yooz quij iitom quih cöiyaqueexot. 3 Ox tpactama xica quih quiistox pac toc cömotat ctamcö czooxöc toc cömotat ziix icasiijim imaa z itoonec hant ac cöiyoomlajc. 4 Xica quih quiistox coi iitxo cah Jesús quij isoj cop cöicazcam itcmaaj haaco cop isxap ac ziix ticop cöihitai ac itahinelca. Hant ac itahinelca ziix icasiijim imaa com hehe hasitj com iti toomma hant ac an hant iyoocmolca. 5 Jesús quih ctamcö tacoi itoocta mizj iti cöihiistox ac itaa taitom ziix icasiijim imaa com ox iyoi:
―¡Hoocta. Ox ma hxoi: Ziix quih mizj hant imaap quih inyaai tintica ma quiiixihi ―ox iyoi.
6 Ox tpactama ctamcö icaitom quih jodíoj coi cöiyahihj ac cöcacoaaj coi pac toc cötoii hant tahca toc cötoii taax oo cömiimöjc: 7 “¿Zo tpactama ctam Jesús hapah hipcop ox teeeha? ¡Yooz quij capöeeeha! ¿Quih tomhaa haquix tiih ziix quih mizj hant imaap quih ziix quih cöisahcoiix ac quih sehe cöiyaya? Ziix quih mizj hant imaap hayaaizi tintica ziix quih quiisax quij cöisahcoiix ac quih chaa ac Yooz quij hooxo tazoj sehe cöiyaha.” 8 Ox tpactama Jesús cop ctamcö tacoi ziix quih iti cöihimöjc taax ipacta quih itaa ox iyoi:
―¿Zo tpactama ziix quij quisxeen cöicocaa quih imiipe taax miistox com ano tahacaha? 9 Hooctam. “Ziix quih mizj hant imap quih inyaai tintica ma quiiixihi”, ox ihmii. Ox oo mpacta xo ctam hipcom ziix iti cöiha z ipoiixta ipacta zo tompaaho. Ox oo mpacta xo he hipi hpozaxö: “¡Atj! ¡Catax!” ox ihpoita iti cöpopactatax cmaax he hisoj hipcop ziix quih cameepit taax iti cöiihca taax masiiyajaha. 10 He xica quih quiistox com tcoo oyacalcam sehe cöiyaha ac xica quih quiistox com ziix quih mizj hant imaap quih iti cöiiitam tanticat ziix quih iti cmique cöisahcaanta quih caixaj quih cöisahcoiix taax hant com iti cöhiitax ac. Mizj masooctamix masiiyaji ―ox iyoi.
Ox tpactama Jesús cop taitom ziix icasiijim imaa com ox iyoi:
11 ―Me ma hxooh. ¡Atj! ¡Hehe hasitj iti mihoom com hexl! ¡Aanpx. ¡Miime ac cöhiin! ―ox iyoi.
12 Hoox xah teme ziix icasiijim imaa com totj hehe hasitj iti ihoom com itexl hant z iqui tiinma tcoo iyooht. Taaxah oo cötpactama tcoo iistox com iyontopl ipi. Yooz quij cöiyacooyaj. Ox yaza:
―Ziix ox hapacta zo cöhiiht zo haa imahcahi ―ox yaza.

4.35-41
Jesús quij hai caixaj cop hax caacoj com iti tiij cöihaactim ac
35 Ox tpactama zaah ticop it hant com timaaxatma Jesús quij taitom xica hipi ziix quih cöiyacoaat coi ox iyoi:
―¡Scalx! Hax caacoj quij toii icp iizc ac saziit ―ox iyoi.
36 Ox tpactama xica quih quiistox quih ptiti coii coi itaaaxoj Jesús quih imacalx canoaa caacoj an ihiij ticomo ano tiijma canoaataj ihmaa quih itaalao yoolx. 37 Ox tpactama hai caixaj zo nyait. Hopatalca tanticat canoaa com ano tapxotim hax iti aiha cah spoct ta toc coyoom. 38 Ox oo mpacta xo Jesús com itx quij iti toom ziix iquiliti zo cötiliti tiim toc coyoom. Itatocasxaj itzaxöt ox iyoaam:
―¡Ziix quih cöcacoaat! ¿Hacx cöhimiihtoj ac ziix z inyaaiya? ―ox iyoaam.
39 Ox tpactama Jesús com totj hai cop hanso itaxanl hax caacoj com ox iyoi:
―¡Axp hax caacoj! ¡Consiijim! ―ox iyoi.
Ox tpactama ox xah teema hai cop cötactimma hax caacoj com tooxp toc cöyoohca.
40 Ox tpactama Jesús quij xica ziix quih cöiyacoaatim coi ox iyoi:
―¿Zo tpactama matiixant? ¿Zo tpactama ox matimaöjcaha Yooz quij mizj hizi scmaaitim ta ox matimaöjcaha? ―ox iyoi.
41 Ox tpactama iistox com itcmaht ipi toc cötoii hipi ptiqui titoij ox yaza:
―¿Zo ziix quiisaxya ctam hipquij hai xah hax caacoj xah commax itaaalaha? ―ox yaza xica ziix quih cöiyacoaatim coi.

5.22-24
22 Ox tpactama jodíoj quih haaco Yooz quih cöcacooyaj quih ano yaii cop ihimöjc quih iti cohj coi zo hant ac cöyoofp. Ctam Jáiro hapah chaaha. Jáiro cop Jesús quij itaho ano timla iihjoj coi an hant timoz toc coyoom. Cöitacooyamma isoj quihiha. 23 Ox tpactama Jáiro quih iisax quih coox com cöiyatolec taitom ox iyoi:
―¡Hoocta! Ihyaazi quih cmaam quisil quih ihiisax com scap ta haa moom. ¡Moha! ¡Iti hinol hahiipet! ¡Hahiisaxot! ―ox iyoi.
24 Ox tpactama Jesús cop itaal yootax. Xica quih quiistox quih catxo tanticat icot tapma cötocaaaxoj hanso pti itacaapis toc contiyat.

5.35-42
35 Jesús cop coi taitomo toc cötapma jodíoj quih haaco Yooz quih cöcacooyaj quih ano yaii cop an ihimoz quih iti coha quih yaaco cop ano mocat pac toc cömotat hant ac cöyoozcam. Jairo quih itzaxöt ox iyoaam:
―Spactaha. Ziix itleno hapah quih imiipla haaha. Ziix quih cöcacoaat cop taa copata hantoozitoj cmaai ―ox iyoaam.
36 Ox oo mpacta xo xica quih quiistox quih yaza ac itii Jesús cop jodíoj quih haaco Yooz quih cöcacooyaj quih ano yaii cop an ihimoz quih iti coha cop itzaxö ox iyoi:
―¡Ziix zo cmiixim! Hanso mizj hiti hiisax ―ox iyoi.
37 Ox tpactama Pedro xah Jacóbo xah Juan Jacóbo quih oyacj xah jodíoj quih haaco Yooz quih cöcacooyaj quih ano yaii cop an ihimoz quih iti coha xah Jesús quih iyaala. Ox oo mpacta xo ihmaa coi iqui itcmacatxiho cöisaala ac Jesús cop. 38 Ox tpactama haaco Yooz quih cöcacooyaj quih ano yaii cop an ihimoz quih iti coha quih yaaco cop cötafpma Jesús cop xica hanso ptino cojoz coi imiiho. Tatooi immaix quih tatxo toc cömoii. 39 Ox tpactama hant ac an cötazquim Jesús cop taitom ox imii:
―¿Zo tpactama hanso ptino matojoz matatooi? Ziix quisil cmaam com he iqui he ihiin ac hacx immiihiha. Hanso quiim xahxaiiha ―ox imii.
40 Ox teema xica quih quiistox coi iqui maatam. Haptco imiiht yax aama ziix quisiil cmaam com hacx cöimiih ac. Ox tpactama Jesús quih xica iqui caatam coi hapx inzam. Ziix quisiil cmaam com am xah ata xah hipi icaala tamocat itoonec ziix quisiil cmaam com hant an ihoom ac an cöimazquim. 41 Ox tpactama Jesús cop ziix quisiil cmaam com inol cop itipjc itzaxö ox imii:
―Talíta comi ―ox imii. Icaitom tahac araméo iitomiha. Ox queeha: Ziix quisiil cmaam me ma hxooh. ¡Atj! ox queeha.
42 Hax iqui tojozma ziix quisiil cmaam com totj hant com iti miihtim. Ziix quisiil cmaam tahac iti coom com hant thanl toocj cöquihiha. Ox tpactama iistox com itcontoplipiho ihameept caha cöiiht ac.

7.18-23
18 Ox tpactama Jesús quij taitom ox iyoi:
―¿Zo tpactama me xica quih quiistox quih hmaa ta coio mazi itmisatajaha? ¿Zo tpactama me mos hant ihiip zo matcmaaj? Ziix quiisax zo haquix piihx ziix oohit z iti mopa Yooz quij iqui cöihiin ac cöicamiipla imaaha. 19 Imoz zo contimaha taaxah aa itahma. Ano yahit quij an hant coitiha. Tyaamma isoj quij quiiixiha ―ox iyoi.
Taax oo hant cöinzam taax ziix quih hapahit coox cah ipahit hapaaha. Yooz quij iqui cöiquiin ac ziix hapahit quih ihmaaha quisoj quij cöimiipla ac.
20 Jesús quij taitom mos ox iyoi:
―Ziix quih quiisax isoj ihaai imiipe xah ziix quih imiipe quih iti cöiitom xah aa itahma taaxah Yooz quij iqui cöihiin ac quisoj quij itcmahiipetiho. 21 Ziix quiisax quih hant quih iti quiij quij imoz quij tiix iti mocaha ziix quih imiipe tintica. Hizaax xica quih imiipe quih pac haaha. Xica quih quiistox coi ziix quih mizj hant imap quih isxeen cöimcaat. Taax quihiimtoj coi imaala quihox ijaptoj caaizilcaha. Imihiimtoj coi hapx cozamlcamiha. Taax ziix quiisax ihmaa quihox hacx imamiihtaj. 22 Taax ziix quih imcoozx. Taax ziix quih quimoz cöimpexl hapah quih iti cohjiha. Taax icaiitim quih imiipe quih imaaizi. Taax cmatoos. Taax ziix ij haii quih isxeen cöitcaat iti isoj cöimaaizi. Taax ziix quih quiisax ihmaa quih ziix quih iti cöipacta quih hant quih iti tahcamax sehe cöitcmaajx iistox hant tompaailxiho. Taax mapöeeex. Taax isolca imqueept. Taax iscomcaaitim ca ac quih imaaizi. 23 Xica quih imiipe hizaax cooxo xica quih quiistox hipi imöjc coi ano mocaha. Taaxah Yooz quij iqui cöiquiin ac quisoj quij itcmahiipetiho ―ox iyoi Jesús quij.

9.2-8
Jesús cop isoj cop ij cöipacta ac
2 Ox tpactama ixaap isnaap cazoj iti toofinma Jesús quih Pedro xah Jacóbo xah Juan xah quih iqui cötiihma hast cacösxaj zo haa tapma iyat ac iti imiimjc tihihama. Ox tpactama Jesús cop yaniicjoj ac oo iti tapma ij tahpactama imiiht. Yooz quij oahiha. 3 Xica iti oquim coi tineehj ziix quih cooxp quih cooxp coox quih cöqueemijiha. Ziix hax ano coahtoj ziix quih cahooxp ox ihahooxp quiya zo haquix imiihiha. 4 Ox tpactama hax iqui tojozma xica ziix quih cöiyacoaatim capxa coi hantx mocat Elías xah Moisés xah hamiime com ano motat hant com cötazcam Jesús cop itacoxajma imiiht. Elías xah Moisés xah Jesús cop ihax mooza. 5 Ox tpactama Pedro quih taitom Jesús quih ox imii:
―Ziix quih cöcacoaat. ¡Aaxah tiipe hizac iti hamoii taax! ¿Hasoomaj quih capxa hasaaizi haaya? Me z impoyaa Moisés quih z ipoyaa Elías quih mos z isyaaha ―ox imii.
6 Pedro cop hipi isojiha xo ziix iti cöiitom ipi z imaaha. Tiixah xica ziix quih cöiyacoaatim ihmaa coi cötiih iistox quihiih cah cöimiixant. 7 Ox tpactama hocala zo toc cömota itaanimma hocala quih icaitom z ano mota ox mee:
―Hooctam. Hipiix tiix ihyaazi imoz hiipe chaaha. Iitom quih mizj ihquecoloj ―ox mee.
8 Ox tpactama xica ziix quih cöiyacoaatim coi hax iqui tojozma hant com imooctam xo xica quiistox coocj tahac iti toiima ocooht coi haptco toc cöimoiiha. Jesús copo oo toc cötapma imiiht.

12.28-31
Icaitom quih quipac cöcaixaj quih hant com iti cahca ac
28 Ox tpactama icaitom quih jodíoj coi cöiyahihj ac cöcacoaaj quih hant tahac zo cötafp Jesús quij cöiitom xah cöizaxöt xah ac iyii. Jesús quij icaitom quih iti cöiitom ac mizj hacx cöiyafin ac imiiya. Ox tpactama tiix Jesús quij itmiiit ox iyoi:
―Yooz quij ziix quih icacoaat quih caixaj quih hant com iti yaahjoj quih ¿hiqui ac quipac cohaya? ―ox iyoi.
29 Ox tpactama Jesús quij taitom ox iyoi:
―Yooz quij ziix quih icacoaat quih hant com iti yaahjoj quih quipac coha quih hizaax haaha: “Hooctam xica quih quiistox Israél hapah. Ziix quih coox cah ihimoz quih iti coha hayayoozxam tiixo haquix quihihaha. Ziix quih coox cah ihimoz quih iti coha ihmaa zo haquix imiihiha. 30 Mimoz quij pocoota iti cöhiisax ziix quih coox cah ihimoz quih iti coha quij. Mos miisax quih coox com iti cöhiisax mos misoj quij iixaj quih pocoota iti cöhiisax Yooz ziix quih coox cah ihimoz quih iti coha quij. Zaah quih coox cah mimoz cösoitaha.” Taax Yooz quij ziix quih icacoaat quih hant com iti yaahjoj quih quipac coha chaaha. 31 Yeeno caap ac cmiso xahxaiiha hizaax haaha: “Xica quih quiistox ihmaa com pocoota miisax quih coox com cöhamsisiin hipi misoj quij tiixo cöhamiisot”. Yooz quij ziix quih icacoaat quih hant com iti yaahjoj quih hizcoi taax quipac coha chaaha Yooz quij ziix quih icacoaat quih hant com iti yaahjoj ihmaa quih iqui cöihiin ac ―ox iyoi Jesús quij.

14.10-11
Jodas cop Jesús quih cösocomjc ha teeme
10 Ox tpactama ctam Jodas Iscarióte hapah quij xica thanl toocj cöquiih tacoi taax oo zo haaha. Ctamcö haaco Yooz quih cöcacooyaj quih ano yaii cop ano cocoaala coi quino tafp ziix quih iti cöpopactata Jesús quij cöisocomjc ha taax imaai. 11 Cöihiii ac iistox hant cötpaailx tom pac isyoj ta imii. Taaxah oo cötpactama ziix quih iti cöpopactata cöisocomjca quih imcaa.

14.44-46
44 Ziix cöcocomjc Jodas hapah cop ziix zo caaha cöimacoaat ox oaiha:
―¡Hooctam! Hozip zo haa pooptax tiix shaa haahi. ¡Tiix hexaj! ¡Hacaalx! Cöiiscan quih iti cöhaaizi! ―ox oaiha.
45 Ox tpactama Jodas cop hant ac cötafp Jesús cop isojaa quij cötafp ox iyoi:
―¡Ziix quih cöcacoaat! ―ox iyoi.
Jodas cop taax oo cömee taax iti Jesús cop iyozip.
46 Ox tpactama Jodas cop icaala tamocat Jesús cop itiipxlamma iyonaizil.

15.6-15
Piláto quij Jesús cop hacx smiih ha teeme
6 Ox tpactama piest pascoa hapah cop cöiifp coox cahx Piláto quij isoj ihaaiha. Heno hapaquim quih toc cötoiimax xica quih quiistox coi oomcaj quih haa tiijmax yopacatx. 7 Xica heno hapaquim coi quihehe quij icp cyaixam pac toc cömoii. Xica ta coio zo haaha ctam Barrabás hapah xica quih quiistox coi pac hacx imamiihitim quihehe quij icp ityai. 8 Xica quih quiistox quih ptiti coii coi Piláto quij cötazcam itzaxöt ox oaamiha.
―Hipi misoj mihaai ac oo contcmah ―ox oaamiha.
9 Ox tpactama Piláto quij taitom ox iyoi:
―¿Jesús jodíoj quih ano quihehe caacoj ihicatx matamcaj? ―ox iyoi.
10 Piláto quij ipacta quih quiyaha. Ctamcö haaco Yooz quih cöcacooyaj quih ano yaii cop ano cocoaala coi Jesús cop itoonec Piláto quij cöimiimlajc taax ziix quih quimoz cöimpexl ac iti mota ahaha. Taaxah aa itahma ox imii. 11 Ox oo mpacta xo ctamcö tacoi xica quih quiistox quih ptiti coii coi iqui itatlolca Barrabás quij cöipacatx ac quiipe teemyo. 12 Ox tpactama Piláto quij itmiiitim ox iyoi:
―¿Az iti cöhihapacta matamcaj Jesús jodíoj quih ano quihehe caacoj xah moai quij? ―ox iyoi.
13 Ox tpactama xica quih quiistox coi teenzil ox yaza:
―¡Hehe hasoaaj caacoj quih iti caxquim! ¡Iqui cösahjeaatim! ¡Taax oo cöhapacta hacx hamiihit! ―ox yaza.
14 Ox tpactama Piláto quij taitom ox iyoi:
―¿Zo tpactama oo metayoaha? ¿Ziix cmiipla zo hapacta itaai? ―ox iyoi.
Ox oo mpacta xo xica quih quiistox coi mos ano teenzil:
―¡Hehe hasoaaj caacoj com iti caxquim! ¡Iqui cösahjeaatim! ¡Taax oo cöhapacta hacx hamiihit! ―ox yaza.
15 Ox tpactama Piláto quij xica quih quiistox quih ptiti coii coi iqui cöihiin ac iquiipe itamzo Barrabás quih iyoocatx. Itacatxma santaar coi Jesús quih cöittacajam itaalajcma cmaax Piláto quih santaar coi iqui iyoocatx hehe hasoaaj com iti poomta iqui cösahjeaatim tama.

15.33-39
Jesucristo quih hacx cöimiih ac
33 Ox tpactama zaah quij iti cötiijma hant com tcoo micoopol. Ano yait cop iqui cöicaaij taax cöiyoomjc. 34 Ano yait cop iqui cöicaaij taax iti Jesús quih ihipon cop taixajma taitom ox yee:
―Eloi, Eloi, ¿Láma sabactáni? ―ox yee. Icaitom tahac hebréo iitomiha. Ox queeha: HiYooz, hiYooz, ¿zo tpactama hin ntacatx? ox queeha.
35 Ox tpactama xica tahac iti coii coi pac toc cötoii iitom ac imiii xo iitom z itcmaaj tooza ox yaza:
―Hooctam. Hantx moca Yooz quij iitom quih caazi Elías hapah quih ixaaa ―ox yaza.
36 Ox tpactama ctam zo toc contita tpanzx tatax ziix ziix cöcaas zo toc cötiihma hoova ix ccapxl quih an itjit xapij zo hete cöitah iqui taa cöisaas xah ta yoomoz. Ctam ticop taitom ox yee:
―¡Haquix oo aii! ¡Saactam! Elías quih cöpoofpx hant isiixquim poho ―ox yee.
37 Ox tpactama Jesús quih teenj taixajma taax iti ihiisax com comcap.
38 Hacx tmiihma haaco Yooz quih cöcacooyaj quih ano yaii quih hatai hahoot ihapoin haaco ic cöcaanim zo toc cötapma ihapoiniha. Jesús com hacx tmiihma hatai hahoot ihapoin ticop iyat ac icp mota iizx cah hant iti cafpiha. 39 Ox tpactama santaar quih ano quihehe cop Jesús quih cöihitai ac iti caap cop hacx tmiihma itaho taitom ox yee:
―Cöquihihat isojihi! ¡Ctam hipcom Yooz quih asaac ti haahi! ―ox yee.

15.42-46
Jesús com hacx tmiih hant com ano moom
42-43 Ox tpactama xica sahpiest ac quih zaah iti cöihataaho quih thaa toc cöcahcaha. Zaah ticop zaah it hant icooca cop zaah tazo cahcailiha. Ox tpactama zaah quij ano tazquimma José hezitim Arimatéa ac ano moca zo toc cömota iisax com itacaixaj Piláto quih hant an ihiij ac ano cötazquim Jesús quih isoj com cömamiiit. José cop xica quih quiistox jodíoj hapah quih an ihimöjc quih iti cohj coi zo haaha. Yaziixojiha jodíoj coi. José quih mos imaqueejim zaah quih Yooz quih ziix quih iti cöipacta ziix quih cöeaal ac. 44 Ox tpactama Piláto quih iisax maanj Jesús com haptco hacx cöimiih ac. Santaar quih ano quihehe quih toc cötapma itaaa cöimmiiit hacx cöimiih xah iicyo ac. 45 Santaar quih ano quihehe cop hacx tmiih teetema itii Piláto quij José quih Jesús quih isoj com cöimahiipet. 46 Ox tpactama José quih hatai cooxp quiipe z ititalhaa isoj com hant itaxquim an imfain. Ox tpactama ziix hacx cmiih hant an ihoom hast hant quitni iti caahca hapaxi pac toc cötahcama an itaxquim hahoot ac hast caacoj zo toc cötiijma itapainl hahoot ac cöimpoin.

16.1-7
Jesús com hacx tmiih miisax
1 Ox tpactama zaah it hant icooca cop iti toofinma María hezitim Magdála ac ano moca xah Salomé xah María Jacóbo quih ata xah hax ihasii quiipe pti immis pac ititalhaaöj ziix ticom iti sacniilajc ta toc cömoii. Taax oo cöipacta ac ziix hacx cmiih com mizj somheemt xah ta tamöjc oaiha. Jodíoj coi isoj ihaaiziha taax. 2 Ox tpactama icatomec quih zaah quih hant capii cop zaah quij hapx taapma cmajiic tacoi ziix hacx cmiih com hant an ihoom ac cömiizcam. 3 Hipi ptiqui tiin tooza ox mooza:
―¿Quih hizi pacoit hizx iscaaix haaya hast ihapoin quij? ―ox mooza. Caacojiha yax.
4 Itooctamma hast caacoj hant quih hahoot ac ihapoin quij ij iqui tiij toc cötiijma imiiht. 5 Ox tpactama ziix hacx cmiih com hant an ihoom ac an cötoizctma inol aapa quih icp ac ctam cmaa ccaii ziix cmique hant cöcaap cooxp z iti quiih zo toc cötiijma itaht iistox com itcontoplipiho. 6 Ox oo mpacta xo ctam tiquij taitom ox imii:
―Hooctam. Miistox coconseaalam. Me Jesús hezitim Nasarét ac ano moca hehe hasoaaj quih iti toom iqui cöhajeaatim quih me ccaatihi. ¡Miisax! Hant hizac iti imiijiha. Mohat. Hooctam hant iti iicmolca ac. 7 Calx. Jesús quih yeeno tap haa ntica iqui me ihiin ac hant Galiléa ac. Cooxo ox caaam Pedro xah xica ziix quih cöiyacoaatim quih hmaa xah coi. Taax ano piijtax masiiht haahi. Hipi ziix quih iti me zaxö ac oo iti cöpopactata masiiht haahi.

16.15-16
15 Ox tpactama Jesús quij taitom ox iyoi:
―Hant com pocoota iti calx Yooz quij iitom ac xica quih quiistox com cooxo cöhaqueexoj. 16 Yooz quij iitom ac mizj iti quiisax zo haquix piihx ano pahtiistax Yooz quij iscmacaantaha. Ox oo mpacta xo Yooz quij iitom ac mizj iti imiisax zo haquix piihx Yooz quij ziix quih iti cöisacaant ac isoj quij iti siihcaha.

16.19-20
Jesús cop hamiime com contcöiha ac
19 Ox tpactama cöizaxö ac tyaamma Jesucristo ihimoz quih he caai cop aa icmiqueto cötaöjcöma hant com cömahcoiix hamiime com contita Yooz quij inol aapa quih icp ac it hant miij. 20 Ox tpactama xica ziix quih cöiyacoaatim coi hant quih coox com iti talx Yooz quij iitom ac cöimaqueexoj. Jesucristo ihimoz quih he caai quih hamiime com ano tiij quicot itaiima xica quih cameepit quih iti isoj cöimapactoj. Taax iti xica ziix quih cöiyacoaatim coi ziix quih iti cöiyaza quih cöihihihat ac cöspaa tama taax oo cöiyapactaha. Taax oo cöspacta taax oo cöspacta.